Se de quauquarren a servit era polemica judiciau d'aguesti dies, mès enlà de çò que s'acabe resolent, ei entà demostrar qu'eth cap de comunicacion, Joan Ramon Colomines, non ei solet ena sua guèrra particulara contra es politics d'Unitat d'Aran, senon que compde damb era proteccion e ampara, ara hètes publiques, des màxims responsables deth Conselh Generau, en especiau deth pròpri Síndic, Carlos Barrera. Ei mès, Colomines, condamnat en Andòrra per rebellia en 2000 (coma revelauem aguesta setmana), s'a convertit en principau esturment d'atac electorau de Barrera e de CDA.
Carlos Barrera comence a auer mès d'un problèma, entre eri eth madeish Colomines, deth qui, peth pas qu'acabe de dar en tot assomir es sues acosacions, non se'n poirà des.hèir enquia passades es eleccions. Era vertat ei que Barrera a liurat eth sòn discors e estratègia a tot un professionau dera crispacion politica.
Semble que damb aguest gèst eth Síndic d'Aran s'a lançat ara desesperada en un moment dificil, eneth quau eth plagi deth projècte dera pomèra ecologica l'a deishat un còp mès sense propòsta pròpria, que rebrembe ara retirada deth projècte de Parc Naturau, aqueth còp per manca de consens.
Ei de besonh de tornar ath debat des projèctes, non des persones, entà qu'es ciutadans agen clar quini modèls de país pòrten dejós deth braç es nòsti candidats. Era demana d'un cara a cara entre Carlos Barrera (CDA) e Paco Boya (UA), es unics qu'an opcions reaus de governar, ei non sonque ua propòsta razoabla senon ua exigéncia de nauta qualitat democratica.
Cap comentari:
Publica un comentari a l'entrada