Unitat d'Aran presentèc deluns es candidatures municipaus en un acte en qué er alcalde de Vielha, Joan Riu, assegurèc que Convergéncia "utilize eth Conselh Generau contra er Ajuntament". Eth candidat tà Síndic, Paco Boya, afirmèc qu'eth papèr der alcaldable convergent Pau Perdices, actuau director executiu deth Conselh (cargue creat ad hoc despús de pèrder era alcaldia) a estat "impresentable e ua vergonha" entàs interèssi deth caplòc d'Aran.Joan Riu presentèc eth projècte "consolidat" de Tuca coma exemple entà arténher er equibri territoriau qu'ei de besonh entà garantir era melhora d'oportunitats "mès enlà dera zòna de Baquèira".
Er alcaldable de Bossòst, Paco Rodríguez Miranda, siguec un des candidats revelacion. Eth sòn discors creèc entosiasme entre es assistents, surtot quan proclamèc qu' "ei aranés tot eth que viu e trebalhe en Aran". "E non ac digui jo, n'ac ditz eth president Montilla, senon qu'ac diguec eth Molt Aunorable President Pujol", atau coma expliquèc en responsa as acosacions contra era sua candidatura perqué "non ei aranesa". Miranda detalhèc un programa entà "trèir a Bossòst deth sòn estancament".
Professor d'institut, Jordi Caseny ei er aute candidat revelacion. Damb un discors seren, er alcaldable de Naut Aran presentèc es èishi d'un "programa seriós qu'assomís es objectius dera transparéncia, dialòg e proximitat, ath servici dera gent".
Eth secretari d'organizacion d'UA, Àlex Sirat, e eth candidat Boya tanben coincidiren en soslinhar qu'er alcalde de Les, Emilio Medan, absent en acte, "ei er alcalde de referéncia qu'a demostrat qu'eth podèr sonque desgaste ara oposicion convergenta".
Cap comentari:
Publica un comentari a l'entrada